Fiskur, Fólk, Veiði

Lokatölur frá veiðitímanum í Veiðivötnum 2020

Lokatölur frá veiðitímabilinu í Veiðivötnum 2020.
Þyngd er skráð í pundum (1 pd = 500 gr.)
Tölurnar eru fengnar frá veiðivörðum í Veiðivötnum.

Sunnudaginn 13. september lauk veiði í Veiðivötnum. Stangveiðitímabilinu lauk 19. ágúst en veitt var í net og stöng 21. ágúst til 13. september.

Alls veiddust 28535 fiskar á veiðitímabilinu.
Alls fengust 17570 fiskar á stangveiðitímanum, 7936 urriðar og 9634 bleikjur. Þetta er mun lakari veiði en undanfarin ár, en svipuð veiði og á árunum 2014 og 2015. Á netaveiðitímanum bættust 766 stangveiddir fiskar við. Heildarafli stangveiddra fiska var 18336 fiskar, 8680 urriðar og 9656 bleikjur.

Flestir stangveiddir fiskar komu á land úr Snjóölduvatni, 5303 og úr Litlasjó fengust 3266 fiskar. Mun færri fiskar veiddust á stöng í Litlasjó í ár heldur enn í fyrra.
Þyngsti fiskurinn er 13,56 pd urriði úr Grænavatni. Stórir fiskar fengust einnig í Skálavatni og Hraunvötnum. Myndir af nokkrum stórum fiskum má sjá á myndasíðu.

Í netin fengust 10199 fiskar, 2134 urriðar og 8065 bleikjur.

Sjá nánar Veiðitölur 2020.

Uncategorized

Frítt í Frostastaðavatn

Gjaldfrjáls veiði verður í Frostastaðavatn sumarið 2020.
Stjórn Veiðifélags Landmannaafréttar hefur ákveðið að í sumar verði aftur gert átak í grisjun á bleikjustofninum í Frostastaðavatni. Veiðin verður gjaldfrjáls og verður bæði heimilt að veiða á stöng og í net. Einungis verður farið fram á góða umgengni við vatnið sem og að skrá fjölda fiska, tegundir, þyngd afla, fjölda neta, möskvastærð og hve lengi þau liggja. Skráning er afar mikilvæg og veiðiskýrslum á að skila að lokinni veiðiferð í söfnunarkassa við Frostastaðavatn (vegamót) eða í Landmannahelli. Best er að nota 30 mm möskva á legg eða smærri. Veiðimenn verða sjálfir að útvega sér veiðarfæri og bát. Veiðitíminn er frá 18. júní til 15. september.

Veiðimönnum er bent á gistiaðstöðu í Landmannahelli og þar eru líka seld veiðileyfi í önnur vötn sunnan Tungnaár.

Fiskur, Fólk, Veiði

Covid-fréttir úr Veiðivötnum

Vinsamlega lesið þennan póst vel.
Starfsmenn í Veiðivötnum vilja koma eftirfarandi á framfæri :

  • Starfsmenn munu fara í húsin og spritta helstu staði sem mest mæðir á.
  • Það verður ekkert í húsunum til eldamensku annað en helluborð.
    Komið með eigin eldhúsáhöld.
  • Vinsamlegast ekki skilja neitt eftir af ykkar dóti þegar þið farið heim (þar með rusl).
    Munið eftir reglum sóttvarnaryfirvalda á tjaldstæðinu.
  • Förum öll varlega og hlýtum reglum sóttvarnaryfirvalda. Þá komumst við heil í gegnum sumarið.

Vegna Covid 19 hefur verið ákveðið að hafa sem minnstan umgang á skrifstofunni í Varðbergi.
Því þarf starfsfólk í Veiðivötnum að fá eftirfarandi upplýsingar sendar í tölvupósti degi fyrir komu í Veiðivötn. Póstfangið er ampi@simnet.is

Það sem við þurfum að vita.

  • Hvaða bókun þú tilheyrir (nafn þess sem greiddi bókunina).
  • Nafn/nöfn veiðileyfishafa í hverjum bíl (fullt verð eða  50% afsl).
  • Tegund bíls / bíla.
  • Bifreiðarnúmer.
  • Litur bifreiðar.

Síðan kemur einn inn á skrifstofu og sækir lykil, leyfin og kvittun fyrir húsi.

Fiskur, Veiði

Bleikjan í Litlasjó

Niðurstöður eru komnar úr erfðarannsókn á bleikjunni sem veiddist í Litlasjó í fyrrahaust.
Niðurstaðan útilokar að um eldisfisk sé að ræða. Erfðaefnið er aftur á móti mjög líkt því sem finnst í bleikjum í Snjóölduvatni og Skálavatni. Líkur eru því á að fiskurinn sé kominn úr villtum bleikjustofni á svæðinu. Ekki verður lagt mat á það hér hvernig fiskurinn komst í Litlasjó. Möguleikarnir geta verið nokkrir.
Vonandi er um einstakt tilvik að ræða.

Sjá eldri frétt um bleikjuna