Category Archives: Fugl

Bleikja í Litlasjó

Bleikja veiddist í net í Litlasjó í byrjun netaveiðitímans í ágústlok. Um var að ræða 56 cm og 2420 gr hrygnu.
Starfsmenn Hafrannsóknastofnunar hafa rannsakað fiskinn. Bleikjan var hrognafull og hefði líklega hrygnt í haust ef hún hefði lifað. Líklega hefur hún hrygnt einu sinni áður (haustið 2018).
Bleikjan reyndist 8-10 ára, líklegasti aldur er 9 ár. 
Hreistur og kvarnir báru þess merki að hún gæti verið af náttúrulegum uppruna eða úr eldi sem smátt seiði.
Þetta byggir á því að hún var smá eftir eins árs vöxt (8 cm samkvæmt bakreikningi á hreistri).
Verið er að skoða það hvort komast megi nær um uppruna bleikjunnar með erfðarannsóknum. 

Vonandi er um einstakt tilvik að ræða. Ein bleikja gerir engan skaða. Í Litlasjó er mikið veiðiálag bæði í stangveiði og netaveiði og því líklegt að bleikjur hefðu komið fram í veiðinni fyrr ef um eitthvað magn væri að ræða. Við vonum það besta.

Veiðivötn 2019

Veiði í Veiðivötnum hófst þriðjudaginn 18. júní kl. 15.

Veiðitíminn er frá kl. 7 á morgnanna til miðnættis (kl. 24).
Veiðiverðir vilja biðja þá sem koma seint í hús að fara hljóðlega og sýna öðrum tillitssemi.

Allt skal komið í ró kl. 1 eftir miðnætti.

Snjólaust er á Veiðivatnasvæðinu og því erfitt að halda aflanum vel kældum. Veiðimenn eru hvattir til að taka með sér ískurl í veiðiferðina. Gott ráð er einnig að frysta vatn í plastflöskum og nota sem kælikubba.

Vegir á vatnasvæðinu eru vel færir fjórhjóladrifnum bílum en mjög þurrir og yfirborðið víðast laus sandur. Bílar geta því orðið mjög óstöðugir á vegunum. Akið varlega.
Vöðin eru góð.

Veiðivötn
10. júní 2019. Lítið er eftir af skaflinum góða í Miðmorgunsöldu nema harður jökulís. Því er mikilvægt að hugað sé að kælingu á afla með öðrum aðferðum en að nota snjó úr skaflinum.

Hús og önnur gistiaðstaða er núna betri en nokkru sinni fyrr, rennandi vatn í öllum húsum og þau eru öll tengd rafmagni. Í hverju húsi eru 2 hellur, tenglar, ljós og rafmagnsofnar. Eins og áður þurfa gestir að hafa með sér potta, pönnur, hnífapör og annan borðbúnað.
Mjög gott símasamband (3G) er víðast hvar á Veiðivatnasvæðinu. Eldsneyti er ekki selt í Veiðivötnum. Næsta eldsneytisstöð er í Hrauneyjum. 
Ekki er hleðsluaðstaða fyrir rafbíla.

Veiðimenn eru hvattir til að ganga varlega um viðkvæma hálendisnáttúruna í Veiðivötnum. Varp margra fuglategunda er núna í fullum gangi og nýgræðingur og mosi sérlega viðkvæmur fyrir traðki. Minnt er á að allur akstur utan merktra slóða er bannaður.

Að gefnu tilefni vilja veiðiverðir í Veiðivötnum benda hundafólki á að passa vel uppá hunda sína á svæðinu. 
Brögð eru að því að hundar þefi uppi beituleifar og öngla á vatnsbökkum. Slíkt hefur leitt til innvortis blæðinga og dauða. 
Varp fugla er í hámark í lok júní og margar tegundir liggja á eggjum fram í miðjan júlí. Hundar eyðileggja varp fugla ekki síður en minkar og refir. Þetta á ekki hvað síst við um svæðið umhverfis Tjaldvatn og skálana en þar eru alltaf nokkur anda- og óðinshana- og lóuhreiður. Hafið því hundana ávallt tjóðraða á svæðinu. Best er að skilja hundana eftir heima.

Sími í Veiðivötnum er: 864-9205
Netfang: ampi@simnet.is