Vegir í Veiðivötnum
Leiðin í Veiðivötn liggur um Hrauneyjar og er á bundnu slitlagi alla leið inn að Vatnsfellsvirkjun. Þar tekur við grófur malarvegur F228 og er leiðin nokkuð greið leið ef varlega er farið. Ekki er þó fært fyrir venjulega fólksbíla alla leið í Veiðivötn.

Tvær ár eru á leiðinni sem stundum eru varasamar. Vöðin eru lagfærð á hverju sumri en geta þó grafist niður og orðið djúp. Hægt er að sleppa við árnar með því að aka Jökulheimaleið F229 upp fyrir Vatnakvísl og koma þá niður í gegnum Hraunvötn og með Litlasjó. Jökulheimaleiðin getur verið torsótt vegna foksands í slóðinni. Leiðin inn í Veiðivötn opnast oftast ekki fyrr en eftir miðja júní.

Innan Veiðivatnasvæðisins er mikið vegakerfi að öllum helstu vötnum. Veiðifélag Landmannaafréttar sér um að viðhalda þeim vegum.

Þessir vegir eru mjög góðir og helst torfært ofan við Hraunvötn og innst með Litlasjó. Þrjú vöð á ám innan svæðisins eru þó ekki fólksbílafær, en hægt að velja aðrar leiðir til að sleppa ánum, nema ef farið er að Tröllinu við Tungnaá.