Sími í Veiðivötnum er 864-9205.

ATH. Stranglega er bannað að hlaða rafbíla / tengirafbíla í Veiðivötnum. Rafmagnstengingar í húsunum eru veikbyggðar og hleðsla rafbíls getur hæglega leitt til íkveikju.
Rafbílaeigendum er bent á góða og örugga hleðslu í Hrauneyjum.

Veiðitölur 2026 – uppfært vikulega (föstudagar)

Myndir af veiði og veiðimönnum sumarið 2026

Ef þú saknar einhvers eftir veiðiferð í Veiðivötn, þá skaltu endilega skoða síðuna um óskilamuni.

Stangveiðitímabilið byrjar þann 18. Júní kl. 15:00 og lýkur þann 18. ágúst kl. 15:00.

Ástand lífríkisins í Veiðivötnum er heldur lakara en undanfarin ár. Vorið var kalt og ís nýfarinn af Litlasjó og Grænavatni. Vatnsstaðan er hærri en á síðasta ári.
Allar leiðir eru færa á vatnasvæðinu nema í Skyggnisvatn. Vöðin eru góð en sem fyrr ekki fær venjulegum fólksbílum.

Skaflinn góði utan í Miðmorgunsöldu er að hverfa. Veiðimenn eru hvattir til að hafa með sér ís / klaka til kælingar á afla. Feitur silungur er fljótur að skemmast ef ekki er kælt.
Gott ráð er að frysta vatn í ölflöskum og nota sem kælikubba og vera með góða kælikassa.

Sem fyrr eru veiðimenn minntir á að ganga vel um veiðistaði. Gróður er mjög viðkvæmur viðkvæmur í Veiðivötnum. Varist að fara nærri hreiðrum. Hafið hunda ávallt tjóðraða á svæðinu. Best er að skilja hundana eftir heima.

Gjaldskrá 2026

ATH: Allt gistipláss í húsum er uppselt í Veiðivötnum.

Gjaldskrá á veiðileyfum og gistingu (hús, svefnpokapláss í skála, tjaldstæði og húsbílar/tjaldvagnar) í Veiðivötnum og í vötnum sunnan Tungnaár fyrir sumarið 2026.

Tilmæli til veiðimanna í Grænavatni. Stjórn Veiðifélags Landmannaafréttar biður veiðimenn sem veiða og sleppa fiskum í Grænavatni að skrá fjölda og áætla þyngd og lengd fiskanna. Þetta á ekki að koma fram í veiðiskýrslum viðkomandi veiðimanna, heldur á að senda upplýsingarnar í tölvupósti á ampi@simnet.is

Ekki nota laxahrogn

Nokkuð hefur borið á því undanfarið að veiðimenn séu að nota laxahrogn í Veiðivötnum. Notkun laxahrogna sem beitu er bönnuð í vötnunum. Bannið var sett á fyrir mörgum árum eftir að kýlaveiki gerði vart við sig í göngu- og eldislaxi hér við land.
Hrognin geta einnig verið smitberar á ýmsum öðrum sjúkdómum sem ganga í laxfiskum og geta auðveldlega borið smit í lokuð og viðkvæm fjallavötn. Ekki viljum við eyðileggja Veiðivötnin með slíku.
Vilji menn endilega nota hrogn sem beitu þá skal nota hrogn úr saman vatni og veitt er í og alls ekki nota bleikjuhrogn í urriðavatni.

Um aðbúnað í veiðihúsum í Veiðivötnum
Í öllum húsunum í Veiðivötnum er: rafmagn, eldavélarhella, örbylgjuofn, kaffivél, heitt og kalt vatn, rafljós og þilofnar. Vatnssalerni er í öllum húsum nema í gamla Dvergasteini.
Gestir þurfa að hafa með sér eigin borðbúnað, diska og hnífapör.
Gott farsímasamband er á öllu Veiðivatnasvæðinu. Þó er sumsstaðar lítið samband í djúpum gígholum. Farsímasendar eru uppi á Snjóöldufjallgarði og á Vatnsfelli. 
Sími í Veiðivötnum er 864-9205.

Veiðifélag Landmannaafréttar var stofnað árið 1965 og varð því 60 ára á árinu. Föstudaginn 14. október var haldið uppá afmælið með veglegri samkomu að Laugalandi í Holtum. Verkefni félagsins hafa frá upphafi verið skýr. Að viðhalda góðri fiskgengd á félagssvæðinu og stuðla að eðlilegri nýtingu fiskstofna. Að rækta fisk í þeim vötnum, sem fisklaus eru, en talin eru vel fallin til fiskiræktar. Þetta hefur allt tekist vel, með því að stilla veiði í hóf, með seiðasleppingum og flutningi á lifandi silung milli vatna. Félagssvæði nær til Veiðivatna og Vatna sunnan Tungnaá.
Jafnframt hefur félagið staðið að myndarlegri uppbyggingu á aðstöðu fyrir veiðimenn í Veiðivötnum.

Einnig var fagnað öðrum ekki síður merkum áfanga. Hjónin Bryndís Hanna Magnúsdóttir og Rúnar Hauksson hafa staðið vaktina sem veiðiverðir í Veiðivötnum í 40 ár (1985-2025) og ekkert fararsnið á þeim enn. Á 60 ára afmælisfagnaðinum var þeim hjónum veitt viðurkenning fyrir vel unnin störf í Veiðivötnum í þessi 40 ár. Flestir sem átt hafa í samskiptum við Rúnar og Bryndísi á þessum tíma eru sammála því að betra starfsfólk er vandfundið til að stjórna og hafa umsjón með þessari öræfaperlu sem Veiðivötnin eru.

Nú er allri veiði lokið í Veiðivötnum sumarið 2025.
Alls fengust 30420 fiskar, 13652 urriðar og 16768 bleikjur.
Það er betri veiði en á síðasta ári en svipað og nokkur ár á undan.

Samanburður á milli ára – heildarveiði 1965-2025

Á stangveiðitímabilinu veiddust 22434 fiskar, 12160 urriðar og 10274 bleikjur. Þetta er betri veiði en undanfarin ár (sumarið 2023 var þó heldur betra). Sjá samanburð.

Flestir fiskar veiddust í Litlasjó. Þar komu 5681 urriði á land. Meðalþyngdin var 1,29 kg og stærsti fiskur 5,00 kg. Næstflestir fiskar veiddust í Snjóölduvatni. Þar veiddust 4743 fiskar, mest bleikjur. Einnig var góð veiði í Stóra Fossvatni (2315), Nýjavatni (2134), Langavatni (2006) og í Hraunvötnum (1588). Sjá nánar í töflu.

AFLI Í VEIÐIVÖTNUM SUMARIÐ 2025

MYNDIR AF VEIÐI- OG VEIÐIMÖNNUM SUMARIÐ 2025

Stærsti fiskur sumarsins veiddist í Stóra Hraunvatni. Hann vóg 7,76 kg.  Stórir fiskar (um og yfir 5,00 kg) fengust einnig í Arnarpolli, Skeifunni, Litlasjó og í Stóra Skálavatni. Stærsta bleikjan veiddist í Breiðavatni. Hún var 2,80 kg. Mesta meðalþyngdin var í Ónefndavatni eins og oft áður, 1,85 kg.

Sjá nánar í töflu.

Mikil ánægja var meðal margra veiðimanna með stangveiðisumarið 2025, enda lengst af mjög gott veður. Ásamt því að reyna við stórurriða þá nutu margir sín vel við bleikjuveiðar, enda fer bleikjan stækkandi í Snjóölduvatni, Langavatni og Breiðavatni og nóg af henni fyrir alla aldurshópa.

Á netaveiðitímanum 21. ágúst – 14. september veiddust 7986 fiskar. Þar af fengust 1008 fiskar á stöng (981 urriði og 27 bleikjur) og 6978 fiskar í net (511 urriðar og 6467 bleikjur).

Sjá nánar í töflum.

Í sumar hafa hlaðist um hlutir sem hafa orðið eftir í húsum. Endilega skoðið og látið vita ef einhver kannast við óskilamunina.
Óskilamunir.

Stangveiðitímanum lauk 19. ágúst.

Sími í Veiðivötnum er 864-9205 / Netfang: ampi@simnet.is

MYNDIR AF VEIÐI- OG VEIÐIMÖNNUM SUMARIÐ 2025

AFLI Í VEIÐIVÖTNUM SUMARIÐ 2025

Veiðitíminn er frá kl. 7 á morgnanna til miðnættis (kl. 24).
Veiðiverðir vilja biðja þá sem koma seint í hús að fara hljóðlega og sýna öðrum tillitssemi.
Allt skal komið í ró kl. 1 eftir miðnætti.

Stangveiðiitímabilið 2025 byrjar 18. júní kl. 15:00 og líkur 19. ágúst kl. 15.
Allar leiðir eru vel færar.
Vatnshæð í Hraunvötnum og Litlasjó er hagstæðari en í byrjun síðasta veiðitíma.
ATH. Skaflinn í Miðmorgunsöldu er horfinn svo veiðimenn sem kjósa að varðveita aflann verða að hafa með sér ís til kælingar.

Gjaldskrá á veiðileyfum og gistingu (hús, svefnpokapláss í skála, tjaldstæði og húsbílar/tjaldvagnar) í Veiðivötnum fyrir sumarið 2025.

Veiði er frí fyrir börn 13 ára og yngri. 

Afbókunarskilmálar eru þeir að ef afbókað er seinna en einni viku fyrir komudag fæst aðeins 50% upphæðarinnar pöntunar endurgreidd.

Pantanir og fyrirspurnir fyrir “Vötn Sunnan Tungnaár” í síma 893-8407 eða info@landmannahellir.is

Í Veiðivötnum er hægt að kaupa gistingu í 6-12 manna skálum og í 40 manna sæluhúsi. Vatnssalerni er í öllum húsum nema í gamla Dvergasteini. Lyklar að húsum eru afhentir hjá veiðivörðum í Varðbergi við komu í Veiðivötn.
Einnig er hægt að gista á tjaldstæði og í svefnpokaplássi í stóra skálanum. Panta þarf pláss á tjaldstæði og svefnpokapláss fyrirfram.

ATH. Þetta á aðeins við um hús í Veiðivötnum, en á ekki við um gistiaðstöðu við Landmannahelli (vötn sunnan Tungnaár).

Áfram verða í boði dagsleyfi í Veiðivötnum sumarið 2025.
Á tímabilinu 1. júlí – 19. ágúst. verður hægt að kaupa dagsleyfi án gistingar í Veiðivötnum. Leyfin gilda frá kl. 7 að morgni og til miðnættis. 
Leyfin þarf að panta fyrirfram deginum áður og þarf að ganga frá greiðslu um leið og pantað er. Verð á veiðileyfi verður samkvæmt útgefinni verðskrá fyrir veiðileyfi í júlí-sept kr. 13500- á stöng á dag. Viðkomandi fær sendar banka upplýsingar og greiðir veiðileyfið og sendir jafnframt upplýsingar um tegund, lit og númer á bílnum sem sem komið er á. Þessar upplýsingar þurfa að berast í síðasta lagi kvöldið fyrir komu í Veiðivötn.
Veiðimaður má byrja að veiða kl. 7 en kemur svo við í Varðbergi og sækir veiðileyfið um kl. 9 -10 um morguninn.

Um aðbúnað í veiðihúsum í Veiðivötnum
Í öllum húsunum í Veiðivötnum er: rafmagn, eldavélarhella, heitt og kalt vatn, rafljós og þilofnar. Vatnssalerni er í öllum húsum nema í gamla Dvergasteini. 
Gott farsímasamband (G3) er á öllu Veiðivatnasvæðinu. Þó er sumsstaðar lítið samband í djúpum gígholum. Farsímasendar eru uppi á Snjóöldufjallgarði og á Vatnsfelli. 
Sími í Veiðivötnum er: 864-9205
Netfang: ampi@simnet.is

Nokkur heilræði
Ekki er selt eldsneyti í Veiðivötnum. Næsta verslun, veitingasala og eldsneytissala er í Hrauneyjum. 
Ekki er aðstaða til að hlaða rafbíla í Veiðivötnum. Sull í ám og fínn sandur er ekki talið fara vel í rafbíla. Eigendur slíkra farartækja ættu að kynna sér vel þol bílsins gagnvart sandi og vatni áður en lagt er af stað í Veiðivatnaferð.

Veiðimenn eru hvattir til að ganga varlega um viðkvæma hálendisnáttúruna í Veiðivötnum. Varp margra fuglategunda er í júní og fram eftir júlí og nýgræðingur og mosi sérlega viðkvæmur fyrir traðki. Minnt er á að allur akstur utan merktra slóða er bannaður.

Hundafólki er bennt á að passa vel uppá hunda sína á svæðinu. 
Brögð eru að því að hundar þefi uppi beituleifar og öngla á vatnsbökkum. Slíkt hefur leitt til innvortis blæðinga og dauða. 
Varp fugla er í hámark í lok júní og margar tegundir liggja á eggjum fram í miðjan júlí. Hundar eyðileggja varp fugla ekki síður en minkar og refir. Þetta á ekki hvað síst við um svæðið umhverfis Tjaldvatn og skálana en þar eru alltaf nokkur anda- og óðinshanahreiður. Hafið því hundana ávallt tjóðraða á svæðinu. Best er að skilja hundana eftir heima.

Veiðifélag Landmannaafréttar – erindi til veiðirétthafa 2025