Blautaver
Blautaver er við Tungnaá norðan við Ljótapoll.
Vatnið er oft dálítið jökullitað yfir sumarið þegar mikið leysingavatn er í Tungnaá en tært fyrri hluta sumars og á haustin. Þá er besta veiðin.
Í vatninu er mikið af bleikju um 1 pund að þyngd og 1.-2. punda urriðar. Stundum veiðast stærri fiskar.
Akfært er að vatninu frá Ljótapolli.

Dómadalsvatn
Vatnið liggur nyrst í Dómadalnum og blasir við af Dómadalshálsi. Vegslóði er að vatninu.
Vatnið er aðgrunnt þar sem komið er að því en dýpra innar.
Í Dómadalsvatni er eingöngu urriði, um 1-2 pund að þyngd.

Frostastaðavatn
Vatnið stærst af vötnunum sunnan Tungnaár og hefur löngum verið vinsælasta veiðivatnið á svæðinu. Aðgengilegt og vinsælt hjá veiðimönnum sem veiða á flugu. Best er að veiða við hraunið í SA-hluta vatnsins.
Í vatninu er mikið af smábleikja allt að eitt pund að þyngd.

Kýlingavötn
Kýlingavötn eru í Kýlingum skammt austan við Landmannalaugar. Vötnin eru tvö og samgangur á milli þeirra og við Tungnaá. Á sumrin eru vötnin jökullituð.
Kýlingavötn eru víðast mjög grunn og efra vatnið er smám saman að fyllast af sandframburði úr Tungnaá.
Áður fyrr var vænn urriði í Kýlingavötnum en nú er þar einkum bleikja, 1-2 pund að þyngd.

Herbjarnarfellsvatn
Vatnið liggur sunnanundir Herbjarnarfelli skammt NV við skálana við Landmannahelli.
Hægt er að aka að vatninu sunnanverðu.
Í vatninu er eingöngu urriði, 1-2 pund að þyngd.
Fáir leggja leið sína að vatninu og veiði getur verið allgóð.

Lifrarfjallavatn
Vatnið er í kvos milli fjalla skammt norður af Dómadalshálsi.
Ekki er akfært að vatninu og um 20 mín. gangur af Dómadalshálsi.
Náttúrufegurð er mikil við vatnið og vel þess virði að skoða það.
Í vatninu er eingöngu urriði, um 1-2 pund að þyngd en oft treg veiði.

Ljótipollur
Ljótipollur er í nokkrum samliggjandi gígum NA af Frostastaðavatni. Gígbarmarnir eru brattir og um 70-120 m háir.
Vatnið er víðast um 10-14 m djúpt, um 500 m breitt og 1000 m langt.
Ljótipollur er að margra áliti eitt besta veiðivatnið sunnan Tungnaár. Þar er eingöngu urriði um 1-4 pund að þyngd.
Akfært er upp á gígbarma Ljótapolls en einstigi niður að vatninu. Einstigin eru brött og laus í sér og fyrir suma mikil þrekraun að komast upp.
Vatnið var mikið sótt af veiðimönnum fyrr á árum en nú eru fáir sem nenna að leggja á sig gönguna niður. Það er vel þess virði að skreppa í Ljótapoll og oft er veiðin mjög góð.

Löðmundarvatn
Vatnið er á fallegum og gróðursælum stað skammt austan við skálana við Landmannahelli sunnanundir fjallinu Löðmundi.
Akfært er að vatninu vestanverðu.
Vatnið er víðast hvar frekar grunnt.
Í Löðmundarvatni er smávaxin, falleg og bragðgóð bleikja, 0,5-1,0 pund að þyngd.
Vatnið hefur lengi verið ofsetið af smábleikju en grisjunaraðgerðir hafa skilað miklum árangri þegar slíkt hefur verið gert skipulega.

Sauðleysuvatn
Vatnið er norðanundir fjallinu Sauðleysur skammt vestan við skálana við Landmannahelli.
Ekki er akfært alveg að vatninu en stutt að ganga.
Vatnið er ofsetið af smábleikju en stærri fiskar leynast alltaf inn á milli.